فرسان البقعة جو *** لي غير الله هم هم ما بركعو
خليل وأعوانو النوم ودعو *** في الجري والهرب هم البدعو
بي وراهم تركو سلاحـم جدعو *** في وسط البقعة ما قعدو إتربعـو
ما ضاقو العصير للببسي إتكرعو *** ليهم الفرسان ليهم تابعو
والقال عايز ينوم من نومو نعنعو *** والميت مات فطيس الناس ما نعو
والقبور جماعي والحفر وسعو *** زي يوم أحد للقليب سعــو 
جايين من تشاد بالعدوان بغو *** روعـو امنين النصر أدعو
في عدد بنوك للنار ولعو *** وفرسان السودان حــالا جو وطفو
إحتسبو كم شهيد جريحم أسعفو *** والميت شهيد بالقــران نعو
والمرتزق الخائن باللسان فعو *** في كبري الإنقاذ لسانو بلعـو
سلاحم ما ضرب والجرى كعكعو *** والفضل متخفي الناس جهجهــو
قبضو بي حجباتو وجعان شبعو *** إلا في الضرب ضربو ولبعــو
ما شاف الخرطوم الأنوار ولعو *** وما طلب لي فول هرسو وصلحو
لي بحري ما وصل إشارة تورعو***وناس النقل سريع عرباتكم أسرعو
وكل وحدة جنودة الدرس هم وعو*** مـا يدخل عميل خليل والودعو
في قصر الرئاسة في تشاد بايعو***على ضرب السودان والغلط صلحو
ودبي العاش في بحري أحسن ركعو*** أدهو العين الحارة راجمات أصقعو
يفتح عينو حالا أوعة تتبعو *** أدوهــو المهالك سلاحكم لعلعـــو
بخاف المرتزق قبال ما يشيعو *** والمستعمر الجديد نفسو أقطعو
أطماعو بتروح بترولنا أحفظو *** للأجيال القادمة أوعة تمضعو
ما وراء البحار الجاكم أقرعو *** بالوحدة والتوافق ثوابت أجمعو
لو الشعب كلو مظلوم أنصفو *** خلو الوحدة جازبة جنوبـــنا عمرو
في أبيي هناك (لينو) ورعو *** حايخرب ديارو لو الناس تابعو
المصفوفة وين ؟ الكسر أجبرو *** لو غلبكم حل لاهاي أخطرو
حضرو للوثائق شهودكم سفرو *** يشهد بي أمانة ما أظن ينهـــرو
وأحسن كل يوم الحاصل فسرو *** والعامل الغلط ما تقولو أستــرو
أدوهو العقاب الرادع وأنزرو *** عبرة للجميع صغار حا يكـــبرو
دونو في الصحف أحفظو وصورو *** لي دارفور هناك ما تتحيـــرو
في الصلح ساعيين مظلوم أنصرو *** تعويض في الفقد وكمان صبرو
يرجع للزراعة معسكر دمرو *** جاب لينا الخراب التنصير حاصـرو
إنسان دارفور لي عريسو سيرو *** طالب الجامعة الدارس للطب خيرو 
ما يخرب لقاعتو دكتور حضرو *** في شغلو وظيفتو ما تتأخــرو
في الشرق السلام عليهو أسهرو *** والقاش البفيض خضار نورو
والضيق من طريق كباري قنطرو *** سهلو للطرق الناس حايوصلو
والمنكر نهي والمعروف آمرو *** مايكون في خيار فقوس يتضـررو
دة الجايب المصايب أوعه تكررو*** كل واحد ساعي الحشاش إستاهلو
يملأ شبكتو حالا لو تتنازلو *** يعيش الناس سلام وكمان يتغزلو
يحققو للوصية يزيدو يتناسلو *** والواقع معانا سريع نتشايلو
يطلع يقيف معانا ما نداغلو *** ونرفع من همومو لو إتثاقلــو
نخفف من ديونو لو إتحاملو *** وما نقدر نقول ونعد الجـاملو
المدينة الفاضلة شعار حا نوصلو *** لو حكمنا دينا خِتيــنا البدلو 
لو تجويدنا عالي بدينا من أولو *** والقرءان حفظنا قصارو وأطولو
مابصيبنا الأعادي مهما أثقلو *** وحالا ندحرم مهما إتوغلــو
ونختم بالحديث القلنا في أولو *** فرسان البقعة جو وإتوغلـو
لقنو للعدو الدرس وبهدلو *** لقنو للعدو الدرس وبهدلــو
شهيدنا إلى الجنان مين البوصلو *** بي إذن الرحيم قرءان بنرتلو
جريحنا المولى يشفيه ويقبلو *** الرحمة عليهو تنزل ماتتعجلـو
يرحمنا اللإله القال أسألو *** يرحمنا الرحيم لــو تتأملو
أمين أمين وحدو هللو *** أمين أميـن وحدو هللـو

رائد شرطة م بشرى مبارك إدريس
السكرتير الثقافي والرياضي والإعلامي
للجالية السودانية بألمانيا الإتحادية
بون